Proprium seu Appendix Martyrologii Romani
pro dioecesibus Bohemiae et Moraviae iuxta editionem alteram accommodatum
CONGREGATIO DE CULTU DIVINO ET DISCIPLINA SACRAMENTORUM
Prot. N. 1256/04/L
BOHEMIAE ET MORAVIAE
Instante Excellentissimo Domino Ioanne Graubner, Archiepiscopo Olomucensi, Praeside Conferentiae Episcoporum Bohemiae et Moraviae, litteris die 5 aprilis 2004 datis, vigore facultatum huic Congregationi a Summo Pontifice Ioanne Paulo II tributarum, Proprium seu Appendicem Martyrologii pro dioecesibus Bohemiae et Moraviae, prout in adiecto exstat exemplari, perlibenter approbamus.
In textu Proprii imprimendo mentio fiat de confirmatione ab Apostolica Sede concessa. Eiusdem insuper textus impressi duo exemplaria ad hanc Congregationem transmittantur.
Contrariis quibuslibet minime obstantibus.
Ex aedibus Congregationis de Cultu Divino et Disciplina Sacramentorum, die 25 octobris 2004.
Franciscus Card. Arinze
Praefectus
X Dominicus Sorrentino
Archiepiscopus a Secretis
Proprium seu Appendix Martyrologii Romani pro dioecesibus Bohemiae et Moraviae continet elogia propria accommodationesque quomodo cum elogiis, quae ad celebrationes pertinent in Calendario Generali inscriptas, in lectione Martyrologii singulis diebus componantur.
Accomodationes sequentes iuxta editionem alteram Martyrologii Romani (29 iunii 2004, Prot. N. 1140/04/L) apparatae etiam ad editionem typicam (29 iunii 2001, Prot. N. 551/00/L) spectant.
IANUARIUS
Die 1 ianuarii
Sequens elogium sic accommodetur:
11. Iablónae in Bohémia, sanctae Zdislávae, matrisfamílias, quae affíctis magno solátio fuit. Ipsíus autem memória apud nos die tricésima maii recólitur.
Die 5 ianuarii
Sequens elogium sic accommodetur:
9. Philadelphíae in Pennsilvánia e Civitátibus Foederátis Amerícae Septemtrionális, sancti Ioánnis Nepomucéni Neumann, epíscopi, e Congregatióne Sanctíssimi Redemptóris, qui migrántes paupertátis causa ope, consílio et caritáte adiúvit et de puerórum christiána institutióne summópere sollícitus fuit. Ipsíus autem memória apud nos die undevicésima iúnii recólitur.
Die 18 ianuarii
Memória beátae Maríae Vírginis, Matris christianórum unitátis, quae, divínae maternitátis dono et múnere cum Fílio Redemptóre uníta, étiam cum Ecclésia íntime coniúngitur typúsque perféctae cum Christo uniónis éxstitit. Unde quoque ómnium christifidélium únio desideráta sub tutéla eius saepe pónitur et ipsa tamquam Mater unitátis invocátur.
Deinde legenda sunt elogia huius diei.
FEBRUARIUS
Die 14 februarii
Sequens elogium sic accommodetur:
1. In Morávia sancti Cyrílli, mónachi, et Methódii, episcopi. Hi fratres Thessalonicénses a Phótio episcopo Constantinopolitáno missi in Moráviam, illuc fidem christiánam praedicavérunt et litterárum notas finxérunt próprias, ut sacros libros e graeco in slávicum vérterent sermónem. Cum Romam veníssent, Cyríllus, qui vocabátur ántea Constantínus, morbo afféctus, mónachus efféctus est et, ibídem hac die obdormívit in Dómino. Methódius, vero, epíscopus Sirmiénsis ab Hadriáno papa Secúndo ordinátus, Pannóniam indefésse evangelizávit, multas lites eídem illátas perpéssus sed semper a Románis Pontifícibus adiútus; labórum suórum mercédem accépit Velehrádii in Morávia, die sexta aprílis. Ipsi autem apud nos die quinta iúlii venerántur.
MARTIUS
Die 2 martii
Post elogium tertium legendum est:
4. Pragae in Bohémia, sanctae Agnétis, abbatíssae, quae, fília regis Ottókari, regálibus núptiis spretis Iesu Christu modo desponsári cúpiens, sanctae Clarae Régulam proféssa plura Clarissárum monastéria ad pristínam vitae formam redúxit, paupertátem ad amússim observáre vóluit. Ipsíus autem memória apud nos die tértia décima novémbris recólitur.[1]
Deinde sequuntur cetera elogia huius diei.
Die 10 martii
Sancti Ioánnis Ogilvie, presbýteri e Societáte Iesu et mártyris, e Scótia proveniéntis, qui post multos annos in stúdiis sacrae theológiae Olomúcii, Brunae in Morávia aliísque locis peráctos exul per regna Európae, sacérdos ordinátus clam in pátriam rédiit, ubi summa cum sedulitáte omnem pastorálem hábuit curam concívium suórum, donec, sub Iacóbo rege Primo in cárcerem coniéctus et morte damnatus, in patíbulo gloriósam palmam martýrii accépit.
Hoc elogium praeponitur primo loco et sequuntur elogia huius diei; textus autem sub numero 7 insertus omittitur.
Die 15 martii
Sequens elogium sic accommodetur:
7. Vindobónae in Austria, sancti Cleméntis Maríae Hofbauer, presbýteri e Congregatióne Sanctíssimi Redemptóris, qui fídei in longínquis regiónibus propagándae et disciplínae ecclesiásticae reformándae mire adlaborávit et, tam ingénio quam virtútibus clarus, haud paucos sciéntiis artibúsque claros viros ímpulit, ut Ecclésiam adírent. Ipsíus autem memória apud nos die vicésima maii recólitur.
Die 17 martii
Sequens elogium sic accommodetur:
7. Olomúcii in Morávia, sancti Ioánnis Sarkander, presbýteri et mártyris, qui párochus Holesoviénsis in Morávia, cum arcána confessiónum trádere renuísset, Olomútii rotae supplício datus est et adhuc spirans cárcerem deiéctus post mensem óbiit. Ipsíus autem memória apud nos die sexta maii recólitur.
Die 20 martii
Sequens elogium sic accommodetur:
10. Pragae in Bohémia, sancti Ioánnis Nepomucéni, presbýteri et mártyris, qui in Ecclésia tuénda multas a Vencesláo rege Quarto accépit iníurias et, torméntis et cruciátibus expósitus, tandem adhuc spirans in Moldávam flumen deiéctus est. Ipsíus autem festum apud nos die sexta décima maii celebrátur.
Die 25 martii
Sequens elogium sic accommodetur:
8. Sazávae in Bohémia, sancti Procópii, qui, uxóre et fílio posthábitis, ad eremíticam vitam se cóntulit, póstea monastério ibídem ab ipso fundáto práefuit et divínas laudes ritu graeco et slávico sermóne celebrávit. Ipsíus autem memória apud nos die quarta iúlii recólitur.[2]
APRILIS
Die 6 aprilis
Sequens elogium sic accommodetur:
6. Velehrádii in Morávia, natális sancti Methódii, epíscopi, qui una cum fratre sancto Cyríllo apud nos die quinta iúlii venerátur.
Die 23 aprilis
Festum sancti Vojtěch (Adalbérti), primi epíscopi Pragénsis et mártyris, qui, Bohémiae ortus, multa perpéssus plúraque itínera pro Christo suscípiens, ad mores pagános exstirpándos strénue laborávit sed, cum propter contumáciam suae gentis et cómitum parum se profícere animadvérteret, Romam se cóntulit et mónachus efféctus est; demum in Polóniam venit et, cum vicínos Borússos ad fidem tráhere intendísset, in vico Tenkitten ad sinum Venédicum a pagánis quibúsdam lánceis transfíxus est.
2. In Palestína, sancti Geórgii, mártyris, cuius gloriósum certámen Dióspoli seu Lyddae omnes Ecclésiae ab Oriénte ad Occidéntem ab antiquitáte célebrant. Ipsíus autem memória apud nos die vicésima quarta aprílis recólitur.
Deinde sequuntur cetera elogia huius diei.
Die 24 aprilis
Sancti Geórgii, mártyris, cuius gloriósum certámen Dióspoli seu Lyddae in Palestína omnes Ecclésiae ab Oriénte ad Occidéntem ab antiquitáte die vicésima tértia aprílis célebrant. Apud nos autem, propter occuréntiam festi sancti Vojtěchi, memória eius ab immemorábili hac die recólitur.
Sequitur elogium sancti Fidelis de Sigmaringen ceteraque elogia huius diei.
Die 30 aprilis
Sancti Sigismúndi, qui, rex Burgundiórum, ex ariána háeresi ad cathólicam fidem convérsus, Agáuni in Ráetia coram mártyrum sepúlcris assíduum psalléntium chorum instítuit, paeniténtia, lácrimis ac ieiúniis scelus patrátum luit et in Aurelianénsi pago ab adversáriis in púteum demérsus mortem occúbuit. Corpus eius e monastério Agaunénse magna ex parte ad ecclésiam metropolitánam Pragénsem translátum est cuiúsque dies natális die prima maii recensétur.
Sequitur elogium sancti Pii papae Quinti ceteraque elogia huius diei.
MAIUS
Die 1 maii
Sequens elogium sic accommodetur:
8. Agáuni in Ráetia, deposítio sancti Sigismúndi, qui, rex Burgundiórum, ex ariána háeresi ad cathólicam fidem convérsus, Agáuni in Ráetia coram mártyrum sepúlcris assíduum psalléntium chorum instítuit, paeniténtia, lácrimis ac ieiúniis scelus patrátum luit et in Aurelianénsi pago ab adversáriis in púteum demérsus mortem occúbuit. occúbuit. Ipsíus autem memória apud nos die tricésima aprílis recólitur.
Die 6 maii
Sancti Ioánnis Sarkander, presbýteri et mártyris, qui párochus Holesoviénsis in Morávia, cum arcána confessiónum trádere renuísset, Olomútii rotae supplício datus est et adhuc spirans cárcerem deiéctus post mensem die séptima décima mártii óbiit.
Deinde legenda sunt elogia huius diei.
Die 8 maii
Beátae Maríae Vírginis, Mediátricis ómnium gratiárum, quae, ab aetérno tamquam Mater Divini Verbi praedestináta, óperi Salvatóris singulári prorsus modo cooperáta est ad vitam animárum supernaturálem restaurándam. Quam ob causam mater nobis in órdine grátiae éxstitit et in Ecclésia títulis Advocátae, Auxiliátricis et Mediátricis invocátur.
Deinde legenda sunt elogia huius diei.
Die 16 maii
Festum sancti Ioánnis Nepomucéni, presbýteri et mártyris, qui in Ecclésia tuénda multas a Vencesláo rege Quarto accépit iníurias et, torméntis et cruciátibus expósitus, tandem adhuc spirans in Moldávam flumen die vicésima mártii deiéctus est. Eiúsque corpus in ecclésia metropolitána Pragénsi honorífice cólitur.
Deinde legenda sunt elogia huius diei.
Die 20 maii
Sancti Cleméntis Maríae Hofbauer, presbýteri e Congregatióne Sanctíssimi Redemptóris, qui, in óppido Tasovice in Morávia natus, fídei in longínquis regiónibus propagándae et disciplínae ecclesiásticae reformándae mire adlaborávit et, tam ingénio quam virtútibus clarus, haud paucos sciéntiis artibúsque claros viros ímpulit, ut Ecclésiam adírent. Cuius dies natális recensétur die quinta décima mártii.
Sequitur elogium sancti Bernardíni Senensis ceteraque elogia huius diei.
Die 30 maii
Sanctae Zdislávae, matrisfamílias, quae, in óppido Křižanov in Morávia nata, conubiális fidelitátis exémplum columénque domésticae pietátis éxstitit, líberos suos studióse educávit, in pauperum servítio se totam impéndit et affíctis magno solácio fuit, nihil de domésticis curis remíttens. Obiit Iablónae in Bohémia die prima ianuárii.
Deinde legenda sunt elogia huius diei.
IUNIUS
Die 15 iunii
Sancti Viti, mártyris, qui aetáte adhuc iuveníli martýrium súbiit témpore persecutiónis Diocletiáni in Lucánia. Bráchium eius dono accéptum sanctus Vencéslaus in ecclésia, quam ipse Pragae constrúxerat, honorífice collocávit.
Hoc elogium praeponitur primo loco et sequuntur elogia huius diei; textus autem sub numero 3 insertus omittitur.
Die 19 iunii
Sancti Ioánnis Nepomucéni Neumann, epíscopi, qui, in óppido Prachatice in Bohémia natus, ánimas Christo lucrári percúpiens in Civitátes Foederátas Amerícae Septemtrionális demigrávit. In Congregatiónem Sanctíssimi Redemptóris ingréssus et Philadelphíae in Pennsilvánia ad episcopátum promótus, migrántes paupertátis causa ope, consílio et caritáte adiúvit et de puerórum christiána institutióne summópere sollícitus fuit. Cuius dies natális recensétur die quinta ianuárii.
Deinde legenda sunt elogia huius diei.
IULIUS
Die 4 iulii
Sancti Procópii, qui, natus in óppido Chotouň in Bohémia, uxóre et fílio posthábitis, ad eremíticam vitam spelúncam Sázavae flúmini incumbéntem incoléndam sibi delégit, póstea in Ordinem Sancti Benedícti ingréssus et monastério ibídem ab ipso fundáto práefuit ac vitútum litterarúmque stúdia mirífice promóvit et divínas laudes ritu graeco et slávico sermóne celebrávit. Cuius dies natális recensétur die vicésima quinta aprílis.
Sequitur elogium sanctae Elisabeth ceteraque elogia huius diei.
Die 5 iulii
Sollémnitas sanctórum Cyrílli, mónachi, et Methódii, episcopi. Hi fratres Thessalonicénses a Phótio episcopo Constantinopolitáno missi in Moráviam, illuc fidem christiánam praedicavérunt et litterárum notas finxérunt próprias, ut sacros libros e graeco in slávicum vérterent sermónem. Cum Romam veníssent, Cyríllus, qui vocabátur ántea Constantínus, morbo afféctus, mónachus efféctus est et, ibídem die quarta décima februárii obdormívit in Dómino. Methódius, vero, epíscopus Sirmiénsis ab Hadriáno papa Secúndo ordinátus, Pannóniam indefésse evangelizávit, multas lites eídem illátas perpéssus sed semper a Románis Pontifícibus adiútus; labórum suórum mercédem accépit Velehrádii in Morávia, die sexta aprílis.
2. Cremónae in Itália, sancti Antónii Maríae Zaccaria, presbýteri, qui ad reformándos fidélium mores Congregatiónem Clericórum Regulárium Sancti Pauli seu Barnabitárum instítuit et Cremónae in Langobárdia ad Salvatórem migrávit.
Deinde sequuntur cetera elogia huius diei.
Die 14 iulii
Beáti Hroznátae, mártyris, qui cóniuge et fílio mórtuis, aulam ducis relíquit et coenóbium Teplénse Praemonstraténsium ab ipso fundátum et ditátum ingréssus est, cuius iura deféndens a praedónibus in loco Starý Kynšperk prope civitátem Egrénsem in Bohémia captus est et fame conféctus ad mortem perdúctus.
Hoc elogium praeponitur primo loco et sequuntur elogia elogia huius diei; textus autem sub numero 5* insertus omittitur.
Die 15 iulii
Sequens elogium sic accommodetur:
15*. Bresláviae in Silésia, beáti Ceslái, presbýteri e primis frátribus Ordinis Praedicatórum, qui in Silésia aliísque Polóniae regiónibus pro regno Dei operátus est. Ipsíus autem memória una cum sancto Hyacíntho apud nos die séptima décima iúlii recólitur.
Die 17 iulii
Beáti Ceslái et sancti Hyacínthi, presbyterórum ex Ordine Praedicatórum, qui, praedicándi atque dilatándi Ordinem a sancto Domínico suscéptam missiónem flagránti zelo adimpléntes, apostólicis virtútibus clari, partem habuérunt fundatióni primórum convéntuum Praedicatótum in Austria, Bohémia et Polónia. Cesláus, in regióne Silésiae natus, die quinta décima iúlii in convéntu Breslaviénsi óbiit. Hyacínthus, primo Jacko (Iacóbus) appelátus, loco Kamien in Polónia natus, cum beáto Cesláo et Henríco Germánico sóciis in Bohémia ac Silésia Evangélium praedicávit et die quinta décima augústi in convéntu Cracoviénsi in Polónia óbiit.
Deinde legenda sunt elogia huius diei.
Die 27 iulii
Sanctórum Gorázdi, Cleméntis, Nahum, Angelárii et Sabae, qui, sanctórum Cyrílli et Methódii opus prosecúti sunt, ab adversáriis litúrgiae slávicae e território Magnae Moráviae expúlsi, fídei lumen pópulo Bulgarórum protulérunt ibíque in fínibus Macedóniae centrum litúrgiae slávicae fundavérunt. Gorázdum, natum in Morávia, sanctus Methódius successórem suum in episcopátu designavit. Clémens, epíscopus factus Velicénsis, eruditióne et sacrárum litterárum sciéntia insígnis, hodiérna die Achridae in Illýrico defunctus est.
Hoc elogium praeponitur primo loco et sequuntur elogia huius diei; textus autem sub numero 12* insertus omittitur.
AUGUSTUS
Die 15 augusti
Sequens elogium sic accommodetur:
8. Cracóviae in Polónia, sancti Hyacínthi, presbyteri ex Ordine Praedicatórum, qui a sancto Domínico designatus est, ut Ordinem in illa natióne propagáret et cum beato Ceslao et Henríco Germánico sóciis in Bohémia ac Silésia Evangélium praedicávit. Ipsíus autem memória una cum beáto Cesláo apud nos die séptima décima iúlii recólitur.
Die 25 augusti
Sanctórum Benedícti, Ioánnis, Mattháei, Isaac atque Christíni, mártyrum, qui in erémo apud locum Miedzyrzecz ad Obram flúvium in Polónia nocte a latrónibus iuguláti sunt. Benedíctus et Ioánnes, sacerdótes ex erémo sancti Romuáldi a duce Boléslao Chrabry invitáti, sociátis sibi duóbus discípulis Matthéo et Isaaco atque fámulo Christíno Polóniae ortis, ad christiánam fidem in Polóniae pártibus propagándam venérunt. Quórum dies natális recensétur die duodécima novémbris.
Deinde legenda sunt elogia huius diei.
SEPTEMBER
Die 7 septembris
Sancti Melchióris Grodziecki, presbýteri et mártyris, qui, Tissínii in Silésia natus, in Societátem Iesu ingréssus et mandáto superiórum obóediens ábiit in Cassóviam in Slováchia ibíque inclítae fídei et fortitúdinis exémplum dedit.Una cum eo étiam Stéphanus Pongracz, présbyter eiusdem Societátis Iesu, et Marcus Crisínus, presbýter Strigoniénsis, nec fame nec rotae ignísque torméntis ad abiurándam fidem cathólicam addúci potuérunt.
Hoc elogium praeponitur primo loco et sequuntur elogia huius diei; textus autem sub numero 15 insertus omittitur.
Die 10 septembris
Beáti Caróli Spínolae, presbýteri et mártyris, qui, natus Pragae in Bohémia et in Societátem Iesu ingréssus, múneri missionário in Iapónia addíctus ibídem usque ad mortem apostolátum exércuit. Ingravescénte persecutióne contra cathólicos, una cum permúltis áliis[3] comprehénsus est et igne cremátus óbiit in urbe Nagasaki.
Deinde legenda sunt elogia huius diei.
Die 14 septembris
Duo sequentia elogia sic accommodentur:
2. Romae via Appia in crypta Lucínae coemetérii Callísti, deposítio sancti Cornélii, papae et mártyris, qui Novatiáni schísmati fórtiter óbstitit, plures de lapsis magna caritáte recépit in communiónem Ecclésiae; a Gallo imperatóre demum Centumcéllas expúlsus, passus est, ut ait sanctus Cypriánus, quidquid pati pótuit. Eius memória apud nos die séptima décima septémbis celebrátur.
3. Carthágine, pássio sancti Cypriáni, epíscopi, sanctitáte et doctrína claríssimi, qui funestíssimis tempóribus Ecclésiam óptime rexit, confessóres fídei in aerúmnis fimávit et, Valeriáno et Galliéno princípibus, post durum exsílium, coram frequentíssimo pópulo a procónsule gládio animadvérti iussus martýrium consummávit. Eius memória apud nos die séptima décima septémbis celebrátur.
Die 16 septembris
Sanctae Ludmíllae, mártyris, quae, ducíssa Bohémiae, una cum cóniuge baptísmi lavácro regeneráta, multis coepit florére virtútibus, máxime erga egénos caritáte. Institutióni praepósita nepótis sui sancti Venceslái, in cuius ánimo amórem Christi ingígnere conáta est, coniuratióne nurus Drahomírae et nobílium paganórum in loco Tetín stragulata est.
Hoc elogium praeponitur primo loco et sequuntur elogia huius diei; elogium autem sanctorum Cornelii et Cypriani crastina die legitur textusque sub numero 8* insertus omittitur.
Die 17 septembris
Memória sanctórum Cornélii, papae, et Cypriáni, epíscopi, mártyrum, quorum prióris deposítio alteriúsque pássio quarto die septémbris recensétur; quos vero, ut indefectíbilis veritátis amóris testes témpore perturbatiónis coram Ecclésia Dei et mundo, una voce christiánus orbis laudat.
Sequitur elogium sancti Roberti Bellarmino ceteraque elogia huius diei.
Die 28 septembris
Sollémnitas sancti Venceslái, mártyris, qui, dux Bohemórum, sapiéntia divína et humána ab ávia sancta Ludmílla erudítus, sevérus in se, pacíficus vero in administrándo regno et erga páuperes miséricors, servos pagános Pragae vendéndos turmátim redémit, ut baptizaréntur; post multas difficultátes susténtas in súbditis regéndis atque fide informándis, a fratre Bolesláo próditus, Véteris Bolesláviae in Bohémia in ecclésia a sicáriis occísus est.
2. Nagasákii in Iapónia, sanctórum Lauréntii Ruiz de Maníla et quíndecim sociórum, mártyrum, qui, tum presbýtari cum religiósi vel laici, postquam fídem christiánam per ínsulas Philippínas, Formósam et Iapónicas disseminavérunt, ex decréto suprémi ducis Tokugawa Yemitsu Nagasákii in Iapónia separátis diébus pro Christi amóre martýrium consummárunt, sed una celebrántur commemoratióne.
Deinde sequuntur cetera elogia huius diei.
OCTOBER
Die 11 octobris
Sequens elogium sic accommodetur:
11*. Gnesnae in Polónia, sancti Gaudéntii seu Radzim, epíscopi, qui sancti Adalbérti Pragensis epíscopi carne et spíritu frater ac fidélis comes, eius martýrio ádfuit ac póstea in víncula coníectus. Ipsíus autem memória apud nos die duodécima octóbris recólitur.
Die 12 octobris
Sancti Radim, epíscopi, qui, in Ordinem sancti Benedícti ingrédiens nomen Gaudéntius recépit, sancti Vojtěchi (Adalbérti) Pragénsis epíscopi carne et spíritu frater ac fidélis comes, eius martýrio ádfuit ac póstea in víncula coníectus; ad episcopátum evéctus, primus archiepíscopus Gnesnae in Polónia constitútus est ibíque étiam óbiit. Cuius dies natális recensétur die undecima octóbris.
Deinde legenda sunt elogia huius diei.
31 octobris
Sancti Wolfgángi, epíscopi, qui post magístri scholae offícium atque professiónem monásticam ad sedem episcopálem Ratísbonae in Bavária evéctus cleri disciplínam instaurávit et, consénsu magnanímiter dato ad provínciam ecclesiásticam sui iuris in Praga constituéndam, bene méritus est de progréssu vitae religiósae in Bohémia.
Hoc elogium praeponitur primo loco et sequuntur elogia huius diei; textus autem sub numero 5 insertus omittitur.
NOVEMBER
Die 12 novembis
Sequens elogium sic accommodetur:
8. Apud Casimíriam ad Vartam flúvium in Polónia, sanctórum Benedícti, Ioánnis, Mattháei et Isaac, mártyrum, qui ad christiánam fidem in Polóniae pártibus propagándam missi nocte a latrónibus iuguláti sunt; cum iis commemorátur étiam Christiánus, eórum fámulus, qui in área sacélli appénsus est. Quorum autem memória apud nos in anniversário translatiónis in Pragam die vicésima quinta augústi recólitur.
Die 13 novembis
Sanctae Agnétis de Bohémia, abbatíssae, quae fília regis Ottokári, regálibus núptiis spretis Iesu Christu modo desponsári cúpiens, Pragae monastérium ab ipsa fundátum ingréssa per plures rexit annos; sanctae Clarae Régulam proféssa plura Clarissárum monastéria ad pristínam vitae formam redúxit, paupertátem ad amússim observáre vóluit. Servitióque infirmórum provídens fundávit fraternitátem, ex qua Ordo Crucigerórum cum stella rúbea evásit. Cuius dies natális recensétur die secúnda mártii.
Deinde legenda sunt elogia huius diei.
DECEMBER
Die 1 decembris
Sancti Edmúndi Campion, presbýteri et mártyris, qui, Londínii in Anglia ortus, fidem cathólicam iúvenis proféssus erat, in Societátem Iesu Romae admíssus et Pragae sacerdótio auctus, in pátriam rédiit, ubi tam verbo quam scriptis fidélium ánimos valde confirmávit, quaprópter Tybúrni post multos cruciátus necátus est. Cum eo éadem torménta subiérunt sancti presbýteri Radúlphus Sherwin et Alexánder Briant, quorum alter in cárcere in Sócietátem Iesu adscríbi méruit. Omnes tres ingénio et fortitúdine exímii sub Elísabeth regína Prima martýrio coronáti sunt.
Hoc elogium praeponitur primo loco et sequuntur elogia huius diei; textus autem sub numero 10 insertus omittitur.
INDEX NOMINUM
Agnes de Bohemia, 2 mar., 4 (4); 6 mar., 11 (5); 13 nov., 1 (18)
Angelar, 27 iul., 1 (13)
Benedictus, 25 aug., 1 (14); 12 nov., 8 (18)
Carolus Spinola, 10 sept., 1 (15)
Clemens Maria Hofbauer, 15 mar. (5); 20 maii, 1 (10)
Clemens, 27 iul., 1 (13)
Cornelius, 14 sept., 2 (15); 17 sept., 1 (16)
Cyprianus, 14 sept., 3 (15); 17 sept., 1 (16)
Cyrillus, 14 feb., 1 (4); 5 iul., 1 (11)
Česlav, 15 iul. 15 (12);
Edmundus Campion, 1 dec., 1 (19)
Gaudentius (Radzim), 11 oct., 11 (17); 12 oct., 1 (17)
Georgius, 24 apr., 1 (7)
Gorazd, 27 iul., 1 (13)
Hroznata, 14. iul., 1 (12)
Hyacintus, 17 iul., 1 (13); 15 aug., 8 (14)
Christinus, 25 aug., 1 (14); 12 nov., 8 (18)
Ioannes Nepomucenus Neumann, 5 ian., 9 (3); 19 iun. 1 (11)
Ioannes Nepomucenus, 20 mar. 10 (6); 16 maii, 1 (9)
Ioannes Ogilvie, 10 mar. (5)
Ioannes Sarkander, 17 mar., 7 (6); 6 maii, 1 (9)
Isaac, 25 aug., 1 (14); 12 nov., 8 (18)
Joannes, 25 aug., 1 (14); 12 nov., 8 (18)
Ludmila, 16 sept., 1 (16)
Maria Virgo, Mater Christianorum, 18 ian., 1 (3)
Maria Virgo, Mediatrix omnium gratiarum, 8 maii, 1 (9)
Matthaeus, 25 aug., 1 (14); 12 nov., 8 (18)
Melchior Grodziecki, 7 sept., 1 (14)
Methodius, 14 feb., 1 (4); 6 apr., 6 (7); 5 iul., 1 (11)
Nahum, 27 iul., 1 (13)
Procopius, 25 mar., 8 (6); 4 iul., 1 (11)
Radzim (Gaudentius), 11 oct., 11 (17); 12 oct., 1 (17)
Saba, 27 iul., 1 (13)
Sigismundus, 30 apr., 1 (8); 1 maii, 8 (8)
Venceslaus, 28 sept., 1 (16)
Vitus, 15 iun., 1 (10)
Vojtěch, 23 apr., 1 (7)
Wolfgang, 31 oct., 1 (18)
Zdislava, 1 ian., 11 (3); 30 maii, 1 (10)
INDEX DIERUM
Ianuarius
1 S. Zdislava
5 S. Ioannes Nepomucenus Neumann
18 BMV, Mater unitatis christianorum
Februarius
14 Ss. Cyrillus et Methodius
Martius
2 S. Agnes de Bohemia
6 S. Agnes de Bohemia
10 S. Ioannes Ogilvie
15 S. Clemens Maria Hofbauer
17 S. Ioannes Sarkander
20 S. Ioannes Nepomucenus
25 S. Procopius
Aprilis
6 S. Methodius
23 S. Vojtěch
24 S. Georgius
30 S. Sigismundus
Maius
1 S. Sigismundus
6 S. Ioannes Sarkander
8 BMV, Mediatrix omnium gratiarum
16 S. Ioannes Nepomucenus
20 S. Clemens Maria Hofbauer
30 S. Zdislava
Iunius
15 S. Vitus
19 S. Ioannes Nepomucenus Neumann
Iulius
4 S. Procopius
5 Ss. Cyrillus et Methodius
14 B. Hroznata
17 B. Ceslaus et Hyacinthus
27 S. Gorazd, Clemens, Nahum, Angelar et Saba
Augustus
15 S. Hyacinthus
25 Ss. Benedictus, Ioannes, Mattheus, Isaac et Christinus
September
7 S. Melchior Grodziecki
10 B. Carolus Spinola
14 Ss. Cornelius et Cyprianus
16 S. Ludmila
17 Ss. Cornelius et Cyprianus
28 S. Venceslaus
October
11 Gaudéntii seu Radzim
12 Radim
31 S. Wolfgangus
November
12 Ss. Benedictus, Ioannes, Mattheus, Isaac et Christinus
13 S. Agnes de Bohemia
December
1 S. Edmund Campian
Excerptum e Praenotandis Martyrologii Romani (editio altera, 29 iunii 2004, Prot. N. 1140/04/L), De Propriis Martyrologii, nn. 38-39.
38. Unicuique dioecesi, nationi vel familiae religiosae exarare licet Proprium Martyrologii seu Appendicem Martyrologii, in qua Sancti et Beati enuntientur in Calendario Proprio inscripti, qui a Martyrologio Romano absint vel diverso die celebrentur vel alio gradu celebrationis peragantur vel quorum elogium opportune aliquantulum amplificare visum est. Huiusmudi Proprium ad Congregationem de Cultu Divino et Disciplina Sacramentorum transmittatur ad recognitionem et approbationem seu confirmationem obtinendam.
39. Quae tamen amplificata elogia ne mere ad modum generis litterariae “Vitae” vel “Legendae” componantur, sed, quantum fieri potest, victoria paschalis Christi in servis suis patefaciant et distinctivam gratiam unicuique tributam fidelibus exhibeant (Sacrosanctum Concilium, 92). Fides insuper historica semper stricte servetur (Sacrosanctum Concilium, 111), nec admittantur elementa homiletica seu “aedificationis”. Ne elogia insuper quadraginta fere verba excedant.